சென்னை: தமிழகத்தில் ஆட்டோ ரிக்ஷா கட்டணங்கள் சுமார் 13 ஆண்டுகளுக்குப் பிறகு மாற்றியமைக்கப்பட்டுள்ளன. இதன்படி, இனி முதல் 1.8 கிலோமீட்டர் பயணத்துக்கு குறைந்தபட்சக் கட்டணமாக ரூ.50 நிர்ணயிக்கப்பட்டுள்ளது. அதற்குப் பிறகு ஒவ்வொரு கூடுதல் கிலோமீட்டருக்கும் ரூ.25 வசூலிக்கப்படும். இதற்கான அரசாணையை தமிழக அரசின் உள்துறை (போக்குவரத்து-I) துறை அக்டோபர் 27ஆம் தேதி வெளியிட்டுள்ளது.
முதல் 1.8 கி.மீ.க்கு ரூ.50
தமிழகத்தில் கடந்த 2013ஆம் ஆண்டு ஆட்டோ கட்டணங்கள் நிர்ணயம் செய்யப்பட்டன. அதன்படி, முதல் 1.8 கிலோமீட்டருக்கு ரூ.25 குறைந்தபட்சக் கட்டணமாகவும், கூடுதலாக ஒவ்வொரு கிலோமீட்டருக்கும் ரூ.12 கட்டணமாகவும் வசூலிக்கப்பட்டு வந்தது.
இந்நிலையில், ஆட்டோ ஓட்டுநர் சங்கங்கள் மற்றும் நுகர்வோர் அமைப்புகளின் கோரிக்கைகளைப் பரிசீலித்து தமிழக அரசு புதிய கட்டண முறையை அறிவித்துள்ளது.
புதிய ஆட்டோ கட்டண விவரம்
- முதல் 1.8 கிலோமீட்டர் – ரூ.50
- கூடுதலாக ஒவ்வொரு கிலோமீட்டருக்கும் – ரூ.25
- மலைப்பாதையில் குறைந்தபட்சக் கட்டணம் – ரூ.60
- மலைப்பாதையில் கூடுதல் ஒவ்வொரு கிலோமீட்டருக்கும் – ரூ.30
- காத்திருப்புக் கட்டணம் – நிமிடத்திற்கு ரூ.1
- இரவு 10 மணி முதல் அதிகாலை 5 மணி வரை – வழக்கமான கட்டணத்தில் 1.5 மடங்கு
மலைப்பாதைகளில் வழக்கமான கட்டணத்தைவிட 1.2 மடங்கு கட்டணம் பொருந்தும் என்றும் அரசாணையில் குறிப்பிடப்பட்டுள்ளது.
13 ஆண்டுகளுக்குப் பிறகு கட்டண மாற்றம் ஏன்?
கடந்த பல ஆண்டுகளாக எரிபொருள் விலை, வாகனப் பராமரிப்புச் செலவு, காப்பீடு மற்றும் உதிரிபாகங்களின் விலை அதிகரித்துள்ளதால் ஆட்டோ கட்டணங்களை மாற்றியமைக்க வேண்டும் என்று ஓட்டுநர் சங்கங்கள் கோரிக்கை விடுத்து வந்தன.
இதுதொடர்பாக பல்வேறு தொழிற்சங்கங்கள் மற்றும் நுகர்வோர் அமைப்புகளிடமிருந்து அரசுக்கு கோரிக்கைகள் வந்துள்ளன. இதைப் பரிசீலித்த தமிழக அரசு புதிய கட்டணத்தை நிர்ணயித்துள்ளது.
தமிழகம் முழுவதும் புதிய கட்டண முறை
இந்தப் புதிய கட்டண முறை சென்னை பெருநகரப் பகுதி மட்டுமின்றி தமிழகத்தின் பிற பகுதிகளிலும் இயங்கும் ஒப்பந்த அடிப்படையிலான ஆட்டோக்களுக்கும் பொருந்தும் வகையில் அறிவிக்கப்பட்டுள்ளது. இதற்கான கட்டணங்களை மாநிலப் போக்குவரத்து ஆணையம் மற்றும் சம்பந்தப்பட்ட மண்டலப் போக்குவரத்து ஆணையங்கள் நிர்ணயித்து நடைமுறைப்படுத்த வேண்டும் என அரசாணையில் தெரிவிக்கப்பட்டுள்ளது.
ஆட்டோ மீட்டர்களை மாற்ற ஆறு மாதங்கள் அவகாசம்
புதிய கட்டண முறைக்கு ஏற்ப ஆட்டோக்களின் மீட்டர்களை உரிமையாளர்கள் அல்லது ஓட்டுநர்கள் தங்களது சொந்தச் செலவில் ஆறு மாதங்களுக்குள் மாற்றியமைக்க வேண்டும் என அரசு உத்தரவிட்டுள்ளது.
அதுவரை புதிய கட்டண விவரங்கள் அடங்கிய கட்டண அட்டை அல்லது Conversion Table-ஐ ஆட்டோவுக்குள் பயணிகள் பார்க்கும் வகையில் வைக்க வேண்டும். மீட்டர் மாற்றப்படும் வரை அந்தக் கட்டண அட்டையில் குறிப்பிடப்பட்டுள்ள அரசு அங்கீகரித்த கட்டணத்தையே வசூலிக்க வேண்டும் என்றும் தெரிவிக்கப்பட்டுள்ளது.
பொதுமக்களின் பயணச் செலவு அதிகரிக்குமா?
புதிய கட்டண முறையால் தினமும் ஆட்டோக்களைப் பயன்படுத்தும் அலுவலகப் பணியாளர்கள், மாணவர்கள் மற்றும் பொதுமக்களின் பயணச் செலவில் மாற்றம் ஏற்படும். அதேநேரத்தில், ஓட்டுநர்களின் நீண்டகாலக் கட்டண உயர்வுக் கோரிக்கைக்கு அரசு தீர்வு வழங்கியுள்ளதாகவும் பார்க்கப்படுகிறது.
இந்தப் புதிய கட்டண முறையைப் போக்குவரத்துத் துறை அதிகாரிகள் மற்றும் காவல்துறையினர் கண்காணித்து நடைமுறைப்படுத்த வேண்டும் என அரசாணையில் அறிவுறுத்தப்பட்டுள்ளது.
